FESTA PADRUEIRA EBC. SANTA MARIA DE FÁTIMA MACADIQUE

            Escola Pre-Secundario Católica Macadique harí iha tinan 1987 ho Santa Maria de Fátima mak sai Padrueira. Desde uluk to’o agora Congregação SVD mak sai Director ou Kepala Sekolah ba Eskola ne’e. Iha tempu Indonesia, escola ne’e ho naran Sekolah Menengah Pertama Katolik (SMPK) Makadiki. Iha tempu nebá, Escola ne’e sai “naran-boot” tamba disiplina no kualidade ne’ebe di’ak. Maibe, iha tempu Timor Leste hetan independencia, komesa tinan 2000 to’o agora, Eskola ne’e nia naran lakon husi publiku, disiplina no kualidade la hanesan iha tempu Indonesia. Ema barak ko’alia: “Tansa SMPK Makadiki agora la hanesan uluk?” Pergunta ne’e presiza resposta husi parte oi-oin.

            Iha tinan 2010, Ministerio da Educação forma sistema foun ho naran Estabelecimentos Integrados de Ensino Básico. Nune’a, Escola Pre-Secondaria 02 Macadique sai Ensino Básico Central (EBC) Católica Santa Maria de Fátima Macadique. Escola ne’e sai sentru ba administrasaun Educação husi Ensino Básico Filial Católica (SDK) Macadique no Ensino Básico Filial Católica (SDK) Sana-Uaitame. Maibe, iha tinan 2013 Ensino Básico Filial Católica (SDK) Macadique integra ho Ensino Básico Central Católica Santa Maria de Fátima Macadique ne’ebe konsentra iha Assamatadu’u-Macadique. Nune’e, Ensino Básico Central hahú husi klase 1 (SD) to’o klase 9 (SMP klas 3).

            Tinan ida ne’e, 13 Maiu, EBC. Católica Santa Maria de Fátima Macadique selebra aniversario ba tinan 27. Tamba ne’e, iha loron ruanulu resin lima fulan Janeiru 2014 forma kedas Comissão Organizadora Festa Padrueira Escola ne’ebe chefe mak Professor Aquelino Fernandes. Maibe, iha momentu forma Comissão ne’e mosu idea atu inan-aman sira mós bele partisipa iha Festa Padrueira Escola ne’e tamba dala barak Escola selebra Festa Padrueira nian, Professor no alunus de’it mak partisipa. Nune’e, iha loron sanulu resin-lima fulan Fevereiru tinan 2014 Director da Escola no Comissão Organizadora aprezenta idea ida ne’e ba inan-aman sira hotu. Inan-aman sira aseita idea ida ne’e no hakarak atu forma sub-comissão atu reforça Comissão Escola nian. Iha loron ida fulan Marsu tinan 2014 inan-aman sira halo inkontru hamutuk no konsege Forma Sub-Comissão Festa Padrueira Escola ne’ebe inklui iha laran Secretario Suco Macadique, Antigo Alunos no Inan-Aman.

            Iha loron sanulu resin-lima fulan Marsu tinan 2014, Comissão hamutuk ho secção ne’ebe forma tiha ona aprezenta aktividades alunus sira nian iha Festa Padrueira Escola. Actividades ne’e fahe tuir secção ne’ebe iha, hanesan tuir mai ne’e:

1. Secção Desporto: actividades ne’ebe hala’o maka Futebol mane, Volybol mane no feto, Tata Kanuru mane no feto, Halai Estafeta mane no feto, Marcar Passo.

2. Secção Certame/Kadi Kakutar: Kadi Kakutak sei halo ba 1^o- 2^o Ciclo (Klase 4-6 SD) no 3^o Ciclo (Klase 1-3 SMP).

3. Secção Artes e Cultura: actividades ne’ebe hala’o maka Canta (grupu), Puizia, Pinturas.

4. Secção Liturgia: Actidade ne’ebe halo mak Lê Biblia.

Iha loron rua nulu resin-neen fulan Marsu tinan 2014 Comissão no Sub-Comissão inkontru hamutuk hodi koalia fila-fali konaba actividades, Fundus, no Premio ba manan na’in sira. Husi sorumutuk ida ne’e nia rezultadu mak hanesan tuir mai ne’e:

1. Actividades ba alunus sira hanesan mensiona iha leten. Maibe, iha loron sanulu resin-rua fulan Maiu tinan 2014 sei halo jogu amizade Futebol mane no volybol mane no feto entre reprezentante Professor/ra no alunus hasoru reprezentante inan-aman.

2. Fundus ba Konsumu festa ida ne’e maka contribuição professor-professora no inan-aman ($ 5 kada familia ida).

3. Premio ba manan na’in sira sei mai husi Amo nu’udar Director da Escola.

Actividades hirak ne’e loke iha loron tolu fulan Maiu tinan 2014 no taka iha loron sanulu resin-rua fulan Maiu tinan 2014. Actividades ne’e la’o ho di’ak no susesu maske iha actividades balun ne’ebe seidauk prepara ho di’ak. Actividades hirak ne’e la’o ho objectivo atu bele hasa’e talentu no kapasidade alunus sira nia iha area oi-oin: desporto, certame, canta, puisia, pinturas no lê Biblia. Iha parte seluk, jogu amizade entre reprezentante Professores no alunus hasoru reprezentante inan-aman sira sai hanesan animação ida no bele hametin unidade no fraternidade.

            Iha loron sanulu resin-tolu fulan Maiu tinan 2014 sei halo Missa Agradecimentu ne’ebe diriji husi Reitor SVD Distrito Viqueque, Pe. Rikardus Pasang, SVD, ho Conselebrante: Pe. Petrus Day, SVD, Pe. Kampianus Tagul, SVD, Pe. Manuel Manoj Kharady, SVD, no Pe. Agustinus Tue Amunmama, SVD. Iha Misa Agradesimentu ne’e partisipa mós lider lokais, Madre sira, convidados, antigos alunos, professores, aman-inan, no alunos sira. (Chaempt, SVD)