Thursday, January 24, 2013

VIVA SANTISSIMA TRINDADE, EM NOSSOS CORAÇÕES E NOS CORAÇÕES DE TODAS AS PESSOAS



Iha loron 15 de janeiro, Familia Arnaldina haksolok teb-tebes hodi selebra loron boot Santo Arnaldo Jansen nian, fundador hosi Congregações toluːSVD, SSpS no SSpS-AP. Loron kmanek ida ne’e hahu ho Triduo nebe sei halao iha comunidade SVD no SSpS nian iha cidade Dili. Loron primeiro hot-hotu halibur hamutuk iha comunidade SSpS Saraka Laran- Becora, hodi reflete kona ba Santo Arnaldo Jansen nia fiar nebe lori nia ba descobre Maromak nia vontade iha acontecimento lor-loron.
 
Iha loron segundo, comunidade de formasaun Postulantado mak dirige iha Comoro. Reflesaun ba loron segundo mak kona ba aspekto missionario Santo Arnaldo Janssen nian, nebe continua too ohin loron liu husi nia membros sira iha mundo tomak. Iha momento neba, ida-idak reflete hikas fali kona ba presensa SVD, SSpS, SSpS-AP no missionarios leigos sira iha kontinete lima (5) liu hosi simbolos lilin cores lima: cor mean representa Amerika, cor mutin representa Europa, cor kinur representa Asia, cor modok representa Afrika, no cor ajul representa Oceania.
 
Ba dala ikus, loron terceiro nian, sei celebra hamutuk iha Comunidade SVD Kuluhun. Tema ba loron terceiro mak kona ba Espirito Santo nia kbi’it nebe boot teb-tebes iha Santo Arnaldo Janssen nia moris. Devosaun nebe bo’ot tebes ba Maromak Espirito Santo lori nia ba consagra nia-an tomak ba Espirito Santo hodi buka deit nia hakarak, maske desafio oi-oin mak nia hasoru.
 
Nune’e, preparasaun tomak hosi Triduo  durante loron tolu nian, lori membros hotu SVD no SSpS ba to’o Atabae hodi hamutuk hasae agradece ba Aman Maromak liu hosi Missa Santa nebe Amo Marsal Dias, Canceler de Diocese Maliana nian mak preside.  Digna tebes atu hasae agradece ba Nai tan nia rasik mak convida, hili no bolu ema ida-idak atu servi nia Reino, tuir Karisma no Espiritualidade Familia Arnaldina nian.

Hola parte mos iha Celebrasaun Eucarística neba mak membros SVD, SSpS hosi diocese Maliana no Dili, representante husi Amo Bispo de Maliana, Pe. Marsal Dias (Canceler), representante husi governo nian, religiosos no religiosas husi congregações sira, convidados sira nomos povo hosi Atabae- Ai lok Laran. Iha momento neba mos, sei inaugura Escola Jardim Infantil nebe sei responsabiliza husi Madres Missionarias Serva do Espirito Santo iha Bairro Ailok Laran.
 
Iha nia homilia Pe. Gabriel Suban,SVD haforsa liu tan kona ba Santo Arnaldo nia fiar nebe klean teb-tebes ba Maromak. Fiar ida ne’e mak lori nia ba descobre Maromak nia vontade iha acontecimentos hot-hotu. “Wainhira nia atu hahu uma ba missionarios sira iha Holanda, ema hotu dehan katak nia ema bulak, basa laiha osan, maibe nia dehan katak osan iha ema laran luak sira nia bolus”. Lia fuan ne’e Amu Gabriel Suban repete husi Santo Arnaldo nia confian nebe klean tebes, atu fo hanoin kona ba ita nia fiar iha Maromak nebe halo kmanek oi-oin iha ita nia moris.
 
Selebrasaun de comemorasaun ba loron bo’ot Santo Arnaldo Janssen nian no mos inaugurasaun ba Jardim Infntil iha Ai lok Laran- Atabae, termina ho confraternizasaun nebe furak teb-tebes nudar familia ida deit iha Cristo.
 
Nune’e sempre iha esperansa katak, fini nebe Maromak kuda iha ema ida-idak nia fuan sei sai buras liu hosi serviso missionario nebe familia bo’ot SVD no SSpS halao iha rai Timor Leste. (Me. Graca, SSpS)








No comments:

Post a Comment

Note: Only a member of this blog may post a comment.